七旋斩决战曼联 碧咸回归显威

万人迷重返奥脱福！今晚欧联16强次回合焦点，当然系曼联主场迎战AC米兰，万人迷碧咸首次以球员身份回归成名地。曼联今场和波都可以出线，王牌前锋朗尼又伤势刚愈，今季作客仲醒神AC就算未必可以反胜出线，但至少有望唔输番个尾彩，让球客胜有2.1倍极之抵博！（有线61及64、中央5台周四凌晨3:45直播）

首回合曼联作客圣西路以3:2反胜AC米兰，但AC如果唔系一早有左闸安东连尼伤出换入费华利，加上史高斯下右脚射空气省中左脚入符碌波，朱枫觉得AC至低限度唔使输。

红黑兵团作客醒

今晚曼联返番主场，好多人都觉佢可以再下一城，不过朱枫就唔系咁睇，首先曼联住3个作客入球，今晚就算输1:2都晋级，根本冇必要同你去尽。更何况前锋朗尼寻日先伤好复操，你睇曼联上场冇佢，对住狼队都同对方拉成均势，就知冇佢几大镬，加埋中场卡域克停赛，入唔入到波都真系成疑问。

AC如果想出线，今场至少要赢曼联2粒，或取得比曼联更多作客入波，听落好似妙想天开，不过AC今场最大优势，系碧咸离开曼联7年后首次重返奥脱福比赛，熟识场地使出七旋斩随时更有信心，加埋大勇朗拿甸奴同柏图，火力实在唔使怀疑，更何况AC今季作客超劲，之前分组赛已经试过赢皇马，暂时意甲又系作客王，曼联要赢佢绝对唔易。